BB瞓左之後，熄左個白噪音得唔得？

「我想試用白噪音幫BB瞓好啲，但真係成晚都要開住？BB瞓著後熄咗佢得唔得？BB床喺我哋房，我驚太大聲會嘈到大人瞓唔著呀...」

白噪音（white noise）係一種有規律性嘅聲音，例如吸塵機同風筒嘅聲音等，能改善睡眠品質。

但有好多人都唔知，其實冷氣機、風扇同抽濕機嘅聲一樣都係白噪音嚟㗎！

呢啲聲音大人一般都已經好習慣，唔會覺得太嘈。

白噪音喺BB瞓覺時應該連續播放，係因為如果聲音突然中斷，BB好可能喺睡眠週期轉接時因為冇咗聲，所以醒咗瞓唔返。

另一類聲稱能有助入睡嘅聲音，例如浪聲，雀仔叫聲等，對大人嚟講有放鬆嘅作用，但由於聲音有高低起伏，對BB極度活躍嘅大腦嚟講，已經係好大嘅刺激，所唔建議畀BB瞓覺時聽。

咁音樂呢？催眠曲可以嗎？

其實，同上面提到嗰種大自然嘅聲音一樣，音樂對BB嚟講同樣會造成一定程度嘅刺激，而且音樂會有完結嘅時候，同樣亦可能會整醒BB。

咁係咪完全唔可以用音樂呢？

其實，有一種音樂對BB有放鬆嘅效果，就係你親口唱嘅歌嘞！

你可以喺放BB落床前後，唱一陣歌畀佢聽，作為睡前儀式嘅一個部份㗎！