BB中招，點樣避免瞓得更差？

呢個星期收到好幾個，都係因為BB中咗招，於是抱咗去大人床一齊瞓，結果好返後BB唔肯再瞓BB床，同埋夜醒多咗，睡眠質素差咗嘅情況

BB病咗，作為父母一定好擔心，會用盡所有方法，希望令BB冇咁辛苦。

BB發燒嘅話，亦會好想攬住佢瞓，方便check住體溫，怕燒得太高會出問題（但其實一般高燒係唔會燒壞腦㗎，除非係腦膜炎）

呢個心情，作為孖仔媽媽嘅我非常理解。

幾年前有次返香港，孖仔F病咗，上呼吸道腫晒，抖氣會有聲

我喺兩日內去醫院睇咗3次醫生，頭兩次排一般私家醫院，情況完全被忽視（仲要一個人抱住佢輪咗2個鐘至見到醫生... ）

嗰2日明顯係一放床佢就好似抖唔到氣咁，於是我一直抱睡咗2日。

最後去咗間山卡啦嘅私家醫院（仲要係年初一晚要call個醫生返嚟睇症），食咗隻勁藥之後立即消腫，返屋企時喺的士就已經瞓到好冧。

之後，放返落床佢都冇事，一切回復正常

要注意嘅係，我之所以抱睡，係因為孖仔F真係呼吸有問題，透唔到氣。

但係，如果你BB/小朋友中咗招，但除咗發燒外冇乜其他徵狀嘅話，我會建議你保持返平時嘅入睡方式，同埋睡眠環境。

尤其是你囝囝囡囡本身係瞓BB床，能夠床上入睡，唔好見佢發燒就抱去大人床

一來易請難送，二來BB本身習慣自己瞓嘅話，同床未必幫到佢，甚至可能令佢瞓唔到。

而最重要嘅原因係，改變咗入睡方式/睡眠環境，好可能會影響到睡眠質素，令夜醒次數更頻密。

病咗最需要嘅係睡眠，就算好返之後，體力都仍然需要時間恢復。

但睡眠質素差咗嘅話，恢復力會更慢。

所以，希望BB快啲好返，保持一致其實更重要。

不過，作息時間上就可以唔需要再跟得咁緊，日頭可以畀佢瞓耐啲唔駛叫醒。

但大原則係，日頭瞓多咗唔會導致夜晚遲咗瞓。

夜間睡眠係最重要嘅，就算日頭瞓幾多，恢復力都冇夜間睡眠咁有效。

所以就寢時間應該要保持返喺平時上下嘅時間，咁BB至係真正瞓得多啲，可以快啲打勝仗✌️

瞓得多至好得快，所以BB瞓咗，亦唔需要半夜整醒佢餵藥或探熱（除非係醫生指示）。

已經停咗夜奶的話，更加唔好諗住半夜畀返枝奶佢呀！

希望你同你BB都能夠平平安安，健健康康

*以上並非醫療建議，請以專業醫療人員所提供嘅意見為準。

伸延閱讀：中招BB嘅媽咪分享

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享