如何同時兼顧兩個小朋友？

有媽咪問

「點樣安排，可以同時兼顧到兩個小朋友呢？

初生BB一日要瞓16-18小時，當你有另一個小朋友要照顧，就再冇可能每日用幾個鐘去氹BB瞓覺。」

所以，自少培養良好睡眠習慣好重要：

1）初生BB未有時間表可言，所以生理上好難定時定候畀佢瞓覺。之不過，你可以從心理上著手，慢慢開始營造一套簡單嘅睡前儀式，例如幫BB換片、著睡袋、拉窗簾、開白噪音等，每次都跟住同一個次序去做，成為一個cue，等BB知道係時候瞓覺，你可以邀請埋大B幫手㗎！

2）初生BB嘅清醒時間得45-60分鐘，餵完奶後掃風換片，已經冇乜時間淨。所以，攪掂其實就已經可以放返BB落床，畀佢自然地自己瞓返，唔需要次次都抱出嚟做活動或玩。咁細個BB，喺床上周圍望下，玩下手指已經好足夠，避免過度刺激係瞓得好嘅重點之一。咁樣做，亦能夠避免養成奶睡抱睡嘅習慣。自細已經能夠床上入睡，睡眠問題自然少好多，佢ready自行入睡時會「話」你知㗎嘞！

3）如果BB留喺床上會喊，需要你留喺佢身邊安撫，或者抱起哄睡，每次嘗試大概30分鐘，瞓唔到就算，離開間房，過30分鐘至再試過，無謂留喺房入面困獸鬥，亦畀你可以有時間陪吓大B。

4）當BB去到6個月大，就可以開始編定作息時間表。你可以安排兩個小朋友喺同一個時段午睡（12-2pm），咁你就可以有得抖抖啦！

5）好多時候，最困擾嘅係夜晚應該點樣安排畀兩個小朋友瞓覺。一般嚟講，建議畀細B瞓先，因為理想嘅就寢時間係6-8pm。之後再同大B準備瞓覺，亦可以有機會過一對一嘅親子時間。

好多時候，知道自己即將成為哥哥姐姐，小朋友會好興奮！只不過，BB出世後，發現原來媽咪會被人分咗一半（甚至更多），好多小朋友都會喺情緒同行為上出現問題，以及睡眠倒退。

你會點樣處理呢？應該點樣處理好呢？

留言「相親相愛」，夠30人舉手就寫篇文啦！

仲延閱讀：

《孩子的角度》http://bit.ly/2JfRz1k

《點樣準備為大B轉房？》https://bit.ly/2YmuRf8