燈與安全感

我囝囝喺2.5歲嗰時，要求喺瞓覺時，開住房門外嘅走廊燈。

於是，我睇住個baby monitor，見佢哋瞓咗就會熄咗盞燈（環保啲嘛！），點知早幾日發現...

佢竟然半夜走出嚟開返盞燈，然後爬返落床繼續瞓覺！

咁點算？

唯有繼續開著盞燈，希望佢過幾日見到冇熄燈，就會安心唔再走出嚟檢查囉！ 

當小朋友去到大概2.5歲左右，想像力越嚟越豐富，會突然開始怕黑，驚有怪獸或其他事會喺熄燈後發生。

咁可以點做呢？你可以：

1. 留盞夜燈，注意唔好用白光或藍光，紅色對睡眠質素影響最少
2. 度門留少少隙，但小心房外嘅聲音會嘈住小朋友瞓覺
3. 囝囝囡囡已滿3歲以上，你可以畀一盞好微弱嘅led燈佢
4. 問吓囝囝囡囡有乜嘢可以令到佢哋安心  

至於細個啲嘅BB，尤其是得幾個月嘅B，佢哋未會有怕黑呢個觀念㗎！

好多時熄燈會大喊，可能只係因為受到突然轉變而嚇親。

下次可以試吓逐步調暗睡房燈光，唔好一次過由好光變到黑晒，睇吓會唔會好啲啦！