一熄燈BB就喊，點解呢？

「一熄燈BB就喊，佢係咪怕黑呢？定係怕咗瞓覺呢？」

想囝囝囡囡瞓得好，第一點就係無論日頭定夜晚，都要閂門拉窗簾，令到間房黑到伸手不見五指。

點解呢？

初生嬰兒出生後，仍然帶有媽咪傳畀佢嘅睡眠荷爾蒙「褪黑激素」，所以未會受到光線影響，喺邊度都瞓得著。

當BB去到6-8周大，母體褪黑激素逐漸消退，大腦會開始自己分泌睡眠荷爾蒙，令BB產生睡意，慢慢進入夢鄉。

但係，光線會抑制大腦分泌褪黑激素，令到BB就算好攰都無辦法輕易瞓得著。

但有媽咪話佢哋囝囝囡囡一熄燈就大喊，咁點算好呢？

首先，BB有呢個反應，係佢嘅認知能力健康發展嘅證明，因為佢明白咗熄燈就等如係時候瞓覺，呢點其實對於培養良好睡眠習慣好重要㗎！

BB會唔會係怕黑呢？

唔係，一般小朋友要到2.5歲至會因為想像力豐富咗而開始怕黑。

咁BB係咪怕咗瞓覺呢？

都唔係，但佢好可能係喺心理上未準備好要瞓覺，所以會大喊嚟表示不滿或不安。

無論係幾個月大嘅BB，或者3歲大嘅小朋友都好，佢哋其實都需要時間去適應轉變。

當BB喺日光日白嘅環境下玩緊，突然畀人抱起帶走，入到房之後又突然黑晒睇唔到嘢，自然會覺得唔高興，甚至嚇親。

咁可以點做呢？

當差唔多時間要瞓時，你可以走去你囝囝囡囡前面踎低望住佢。

當你得到佢嘅注意後，再同佢講：「係時候入房，休息一陣間嘞，我可以抱起你嘛？」

跟住向佢張開雙手，等佢向你表示ok，喺抱起佢之前再講一句：「我而家抱起你嘞！」

抱起你囝囝囡囡一齊行入房時，你可以同佢預告接住落嚟嘅睡前儀式，例如：「而家我哋入房，我會放低你同你換片，跟住幫你著睡袋。我會抱住你，然後開白噪音同閂門，我會唱隻歌畀你聽，然後放你落床，再坐喺側邊陪住你。」

以上呢個做法，能夠畀BB一個過渡期，做好心理準備。

之不過，想減少BB瞓覺前喊嘅情況，最重要嘅都係要喺BB疲勞過度之前就畀佢瞓，唔好等到佢勁打喊露同捽眼至入房啦！