要抱好耐...唔要瞓覺...

好多時都會聽到有媽咪爹哋話，小朋友喺進行睡前儀式時會反抗，之後一落床就大喊...

呢一幕都曾經喺我屋企上演

嗰時我對孖仔3.5歲，食完飯返房刷牙洗面換睡衣已經做慣做熟，最多間唔時出吓絕招等佢哋合作啲。攪掂後兩個人仔就會自己上床，唔會再掙扎或投訴。

嗰晚反常地，其中一個囝囝搶咗隻牙刷要自己刷，又唔肯換睡衣

其實佢食緊晚飯時，已經話攰，想快啲休息，呢幾日佢哋的確係早咗醒，積累咗啲睡眠債。

我見唔對路，繼續拖落去都冇好結果，唯有出動 #RIE育兒法，肯定同接受佢嘅感受，但由於刷牙係衛生問題，冇得講數一定要刷，亦都同佢換埋衫。

攪掂後，佢自己已經即刻走咗上床，不過就喺度猛話要抱。我話好啦我會抱你，抱完之後就要瞓覺嘞...

佢講乜嘢呢？

「要抱好耐... 唔要瞓覺... 」

呢句說話係咪聽慣聽熟呢？未識講嘢嘅BB，疲勞過度時大喊，我相信其實都係表達緊同一個意思。

點做好？繼續抱？咁真係唔駛瞓喎

呢個時候，又係RIE育兒法出場嘅時候嘞！

當小朋友作出各種要求，一一順從係咪就最好呢？定係會令佢覺得自己有太大嘅power，可以左右到你嘅情緒同行為，反而覺得唔夠安全感，需要繼續去測試你嘅底線呢？

究竟，小朋友講一句說話嘅背後，佢真正嘅需要係乜嘢？其實佢需要嘅，可能係你能夠明確地同佢say NO ，令佢安心，唔需要再測試你嘅底線。

於是我同囝囝講：

「我知道你覺得唔舒服，所以想我一直抱住你。我而家抱住你一陣，然後就會出去，唔阻住你瞓覺。 因為我知道你而家最需要嘅係休息。」

抱完放手，講句goodnight我就離開間房。

囝囝喺床上碌住叫咗一分鐘，跟住就停咗。

我內心暗喜 -- 媽咪 1 ：囝囝 1 （打和因為佢真正需要嘅係瞓覺，所以win win ）

呢個時候，我見到另一個囝離開張床，我勁驚！好耐都冇發生過㗎嘞喎

點知原來係之前執漏咗本書，佢拎返出嚟畀我，跟住就走返上床嘞。

呢個時候，之前投訴嗰位企咗起身同我講：

「而家nani*覺得好啲 」跟住又瞓返低。

我同佢哋講句「goodnight, love you」，佢哋兩個一齊回應返「goodnight, love you」

小朋友都有情緒，宣洩完就舒服晒，瞓得。

*nani係佢起畀自己嘅名，由細到大咁會咁樣叫自己，原因不詳。係到差唔多4歲，至肯認返自己真名