越夜越興奮

有媽咪問

「我囝次次食完晚飯，就好興奮咁喺度尖叫大笑，走嚟走去，完全唔攰囉！晚晚攪到11點幾至開始冇電，然後第二朝6點就醒，畀枝奶佢至再瞓到9點...」

好多媽咪都會見小朋友捽眼打喊露，至會帶佢入房瞓覺。

其實，當你見到小朋友出現呢個狀態，好可能已經遲咗。尤其是，如果你囝囝囡囡夜晚會好high，完全冇想瞓嘅跡象，其實佢已經係疲勞過度嘞！

當身體太攰，但又未有得休息，為咗能夠繼續撐落去，大腦分泌壓力荷爾蒙，有一個2nd boost嘅效果，於是小朋友就會進入亢奮嘅狀態。

所以，小朋友食飯時烏眉恰睡，食完就醒晒冇時停，就係咁解囉！

咁應該幾點瞓至啱？呢點主要視乎小朋友嘅生理時鐘，同埋朝早幾點會醒。

2歲前建議6-8點要瞓著，3歲前仲有瞓晏覺嘅9點都得，但實際時間應該要係起身後12小時。

即係話，6點醒就要6點瞓，7點醒就要7點瞓，8點醒就要8點瞓。

唯一例外係喺18個月至3歲，呢段時間已轉一覺，日頭瞓到2個鐘嘅話，咁夜晚就瞓10-11個鐘都得