睡眠終極一關 - 安靜時間

「今日講終極大佬 -- 停止午睡

唔駛瞓晏覺嘞喎，多咗好多時間去街，又唔駛再計清醒時間，唔係應該開香檳慶祝咩？」

well... 打完大佬爆咗機就係囉，但打大佬嘅過程，分分鐘係以月計。

你諗吓，有瞓晏覺時清醒時間係5-7個鐘; 唔瞓晏覺嘅話，一下子跳到12個鐘，double咁滯喎

先講講停止午睡嘅跡象：

• 午睡時間一直喺度玩、自言自語或唱歌，攪到好晏至瞓得著

• 午睡後，夜晚需要好耐至瞓得著

• 冇瞓晏覺，黃昏時情緒亦未受影響

開始停止午睡期間，你囝囝囡囡可能一星期仍需要午睡3-4次。

應該點樣處理呢段轉接期呢？

你可以設定一段「安靜時間」（quiet time）。

喺安靜時間內，小朋友必須留喺睡房/床上，但你無須強迫佢瞓。

如果你囝囝囡囡唔習慣獨自留喺房入面，你可以喺安靜時間留低陪住佢，但必須盡量避免太多互動，以免令佢受到過份刺激。

你可以同佢講，呢個係畀你哋一齊休息嘅時間。畀佢自己選擇要瞓，或做一啲靜態活動。

你可以將燈光較暗少少，同埋畀囝囝囡囡做一啲無須太多光線嘅活動，例如聽故事錄音、砌積木同砌圖等，選擇嘅活動必須避免造成太大刺激，令佢太興奮。你亦可以準備一啲特別嘅玩具，只能喺安靜時間內玩，吸引佢留喺睡房內。

如果你囝囝囡囡喺安靜時間期間瞓著咗，無論幾點瞓著都好，亦必須喺距離就寢時間至少5小時之前叫醒佢，以免夜晚瞓唔著。夜瞓係早醒嘅主要原因之一，午睡太遲，令夜晚太遲至瞓，往往會令睡眠總時數下降，積累睡眠債，影響日間作息，甚至出現/惡化夜醒嘅情況

安靜時間至少要有1小時，如果你囝囝囡囡能夠獨自留喺睡房內，就可以一直畀佢留到午睡時間完結。

注意如果冇瞓到晏覺，無論有冇做安靜時間都好，夜晚都要早最少1小時準備瞓覺呀！