要抱至肯瞓，係咪寵壞咗？

「囡囡一定要有人抱住至肯瞓，係咪寵壞咗......」

我相信所有媽咪都曾經試過抱住囝囝囡囡氹瞓覺，包括我自己在內。睇著BB瞓到好冧嘅樣，幾辛苦都值得

但當BB去到大約4個月大嘅時候，突然開始頻頻夜醒大喊，每次都要抱住佢搖呀搖，甚至喺房內行嚟行去，BB至肯瞓返...

其實BB都唔想咁樣㗎！唔係BB天生鍾意畀人搖嚟搖去，更加唔係寵壞咗，佢哋只是習慣咗要畀人搖住，至瞓得著咋！

呢種協助BB入睡嘅方式，稱為sleep props，BB自小習慣咗呢種入睡方式，就會將搖晃嘅感覺，同睡眠連埋一齊，形式關聯。於是，每次醒咗都必須再次借助搖晃嘅感覺，至可以再瞓得返。

需要依賴sleep props入睡，並唔一定係壞事，好多成年人習慣開住電視瞓覺，都係sleep props嘅一種。

但當所使用嘅協助入睡方式，唔能夠持久用得到（每日抱住10kg重嘅BB幾個鐘，手都斷），並且會令BB嘅睡眠質素受到影響的話，咁sleep props就會成為一個困擾嘅問題嘞！

所以，正正就係搖睡呢個哄睡方式，令BB無法瞓過夜。

咁應該點做好？

首先有一點要講清楚嘅係，喺睡眠週期之間醒一醒係好自然同常見嘅事，就算係成年人亦都經常發生，只係我哋好快又再瞓返，所以冇察到咁解。

畀BB學識自行入睡，或至少喺床上入睡，當BB半夜醒嘅時候，就自然能夠再次自動入睡，唔駛大喊求救。既然你冇聽到BB喊，咁就等如係BB瞓過夜啦！至於點樣協助BB學識自行入睡呢個問題，就要視乎BB嘅年齡、性格、睡眠環境，以及家長嘅教養方式而定。

如果你希望BB能夠喺床仔自己瞓唔駛人抱，必須要先制定一個全面計劃，千祈唔好諗住就咁放BB落床就算呀！就算BB能夠自己瞓得著，甚至識得自行入睡，如果作息時間未如理想，或者有其他因素影響，BB一樣會夜醒大喊，唔可以自己瞓得返㗎！

未滿6個月大嘅BB，未能夠完全掌握自行入睡嘅能力，所以你可以繼續幫你囝囝囡囡入睡。只要畀BB每日至少一次，練習床上入睡就得，並且注意唔好錯過BB入睡嘅最佳時機呀！

相關諮詢服務及網上課程：

Transformational諮詢計劃，適合希望改變哄睡方式，令孩子能在床上入睡的家庭 。正向睡眠顧問Catherine會親自為你分析BB瞓得唔好嘅種種原因，同你一齊訂定目標，並提出貼身建議。

喺專為0-5個月大BB而設嘅《健康睡眠工作坊》，我會講解點樣慢慢戒抱睡搖睡，重點係嘗試，唔係強迫要做到。配合埋其他因素，慢慢幫BB培養良好嘅睡眠習慣。